ТОШКЕНТ, 14 февраль. /«Дунё» АА/. Март ойи ўзбек бокси мухлислари учун яна ғалабали онларни тақдим этиши кутилмоқда. 3-10 март кунлари Иорданиянинг Амман шаҳрида бокс бўйича Осиё-Океания қитъалари учун Токио Олимпиадасига йўлланма берувчи турнир бўлиб ўтади, деб хабар бермоқда «Дунё» АА мухбири.
Мазкур мусобақада иштирок этадиган терма жамоамиз вакиллари 16 февраль куни Иорданияга жўнаб кетади.
Боксчилар Амман шаҳрида мусобақа бошлангунига қадар ўқув-машғулот йиғинини олиб боради. Мазкур йиғин якунига кўра терма жамоамиз мураббийлар штаби лицензион мусобақада қатнашадиган жамоамиз таркибини аниқлаб олади.
Иорданияга жўнаб кетадиган боксчиларимиз таркибидан Олимпиада, жаҳон ва қитъа чемпионатлари ғолиб ва совриндорлари ўрин олган.
