ТОШКЕНТ, 22 январь. /«Дунё» АА/. Бугун «Ўзбеккино» миллий агентлигида Италиянинг Ўзбекистондаги элчиси Агостина Пинна билан учрашув ташкил этилди, деб хабар бермоқда «Дунё» АА мухбири Агентлик маълумотига таяниб.
Тадбирда Агентлик бош директори Фирдавс Абдуҳолиқов Агостина Пинна икки давлат киноижодкорлари ўртасида ҳамкорликни йўлга қўйиш, биргаликда маҳсулотлар яратиш масалаларини муҳокама қилди. Шунингдек, Италияда «Ўзбек киноси кунлари» ҳамда мамлакатимизда «Италия киноси кунлари»ни ўтказиш билан боғлиқ масалалар ҳақида ҳам сўз юритилди.
Бундан ташқари, жорий йил Италияда «Ўзбек маданий мероси Италия тўпламларида» китобининг тақдимотини ўтказиш ҳамда Ўзбекистон маданий меросини ўрганиш, сақлаш ва оммалаштириш Бутунжаҳон жамияти томонидан европалик олимлар иштирокида халқаро конгресс ташкил этиш каби масалалар ҳам кўриб чиқилди.
